我哋做過嘅收據辨識項目 ThatReceipt 用 76 張真實收據做過實測：金額準確度 94.7%、幣別準確度 98.7%、每張大約 3 秒。
呢個數字最有用嘅地方唔係「幾高」，而係「有得量」。任何人同你講佢個 OCR 好準，你都應該問返：用邊批文件測？幾多張？邊個欄位？我哋開工之前會攞你自己嘅文件做同一件事，出返一個屬於你嗰批文件嘅數字，而唔係一個 marketing 數字。
抽到嘅欄位可以直接入你後台，唔使人手打第二次 —— 呢個先係慳返時間嗰部分。單純「認到啲字」但仲要人手覆製貼上，其實冇慳到幾多。
「文件識別」聽落係一個功能，實際上每種文件都要獨立校準。
我哋個 OCR 示範而家支援結婚證書、身份證同出世紙三種，住址證明仲喺開發中。單係香港身份證就抽 9 個欄位：中文姓名、英文姓名、姓名電碼、出生日期、性別、符號、首次登記碼、簽發日期同身份證號碼。
出世紙同結婚證書更加麻煩：辨識引擎讀出嚟嘅文字次序唔可靠，同一張紙每次讀出嚟嘅排列都可能唔同。所以我哋唔靠次序，改為用空間座標 —— 即係睇每個字實際印喺張紙嘅邊個位置，再按位置對返落欄位。呢個做法麻煩好多，但係抽得穩陣好多。
水印蓋住嘅欄位會抽唔到。掃描太淺、影得斜、反光、摺痕，全部會影響結果。呢啲唔係軟件寫得差，係辨識本身嘅物理限制 —— 人眼睇唔清楚嗰啲位，機器一樣睇唔清楚。
所以辨識永遠唔會百分之一百準。緊要嘅欄位（金額、證件號碼、日期）應該保留一個人手覆核步驟，或者設一個信心門檻，低過門檻就轉人手。我哋設計流程嗰陣會直接同你講邊啲欄位可以放心自動化、邊啲要留人。
亦都唔好攞示範嘅結果直接落帳。示範係畀你睇個能力，唔係一個經過你公司流程驗證嘅系統。
呢個係最多人問嘅一條。
我哋個 OCR 示範入面，你上載嗰張圖只喺記憶體處理：傳去 Google Cloud Vision 做文字辨識，抽到嘅欄位回傳你部瀏覽器，我哋呢邊唔會寫入任何資料庫、儲存桶或者檔案。你可以喺私隱政策睇到同一句嘢寫得更詳細。
正式生產用途嘅時候安排唔同：系統行喺你自己個雲端帳戶，文件同抽到嘅數據都留喺你自己嘅環境，我哋唔會經手。呢個唔止係私隱問題，亦係擁有權問題 —— 你隨時可以收返權限而唔會失去個系統。
順帶一提：示範係免費、唔使留 email，你想試幾多次都得（合理使用範圍內）。
最平嘅開始方法係零成本：攞你自己一份真文件去試個示範，睇下佢喺你嗰種文件上面表現點。試完你會即刻知呢件事對你有冇用。
要做正式系統嘅話，AI 文件識別由 HK$32,000 起，包一種文件類型校準、用你真實文件做準確度實測、同接入你自己後台。每加一種文件類型由 HK$12,000 起。如果你嘅痛點唔止係認字，而係成個流程（例如收據入帳、對賬），可以睇自動化模組，由 HK$18,000 起。
我哋建議由最痛嗰種文件開始 —— 通常係每個月數量最多、而家靠人手打字嗰種。做一種、驗一種、慳到時間先做下一種。