自動出價唔會問你個訊號啱唔啱，佢淨係照住你畀佢嘅數字去 optimize。所以轉換追蹤一壞，佢唔會停 —— 佢會加速去買啲「睇落好平」但實際冇成交嘅點擊。
最陰險嗰種係喺網站數據追蹤嗰邊剷走或者改動咗一個「關鍵事件」嘅定義。呢個動作喺分析工具入面睇落好無害，但廣告平台收到嘅出價訊號會即刻斷；系統唔會彈任何錯誤訊息，報表上面啲數字仲會靚咗，因為分母冇咗。等你發現嗰陣，錢已經燒咗一段時間。
驗法唔複雜：攞廣告平台報嘅轉換數，同你後台真訂單逐日對。對得返先好信；對唔返就要即刻查，唔好等月尾。呢一步我哋幫客做嘅時候永遠行喺落錢之前 —— 追蹤未驗得住，就唔應該加預算。
第二個死因更難察覺，因為出事嘅唔係廣告，係你睇緊嗰份報表。
如果你用一個滾動時間窗（例如「過去 30 日」）去睇成效，而中間換過 primary conversion action，個窗就會同時撈住換之前同換之後兩套口徑嘅數。系統唔會有任何 warning，你只會見到一個睇落好合理嘅數字。而且方向係固定嘅：結果一定偏樂觀，因為新口徑通常計得闊啲。
修法係報表要鎖死用邊個 conversion action，唔好靠平台預設，亦唔好喺換咗口徑之後仲攞跨期數字去比較。落任何「加預算」或者「閂 campaign」嘅決定之前，先確認你兩邊比較緊嘅係同一樣嘢。呢個唔係理論問題 —— 我哋審過嘅帳戶入面，呢一條係最常見嘅「數字靚但生意冇動」根源。
Shopping 同 target ROAS 出價要儲夠兩至三個星期數據先有意義。而轉換本身有延遲 —— 今日嘅點擊可能三日後先成交 —— 所以最近幾日嘅 ROAS 一定偏低，攞嚟落結論即係自己嚇自己。
仲有一個常見誤判：見到 ROAS 未到目標，就再推高 target ROAS。實際上 target 設得太高，系統會直接放棄競投，你會由「賺少咗」變成「冇曝光」。判斷 target 係咪太高，應該睇 rank-lost impression share（因為出價唔夠而輸咗嘅曝光佔幾多），唔係睇最近幾日嘅 ROAS。
跑咗三日就閂 campaign，係最貴嗰種慳錢方法 —— 你唔單止冇買到成交，仲買咗一堆冇用嘅學習期數據，下次重開又要由頭學過。
廣告撳落去係首頁而唔係嗰件貨，等於買咗個客返嚟再叫佢自己搵。一個有幾千個 SKU 嘅目錄，如果全部廣告都指去首頁，個產品 feed 整得幾乾淨都冇用。
所以做嘅時候，產品 feed、落地頁同 campaign 最好係同一隊人手上：價錢、庫存狀態同標題三邊一致，客撳落去見到嘅就係佢喺廣告見到嗰樣嘢。呢啲嘢分開兩間公司做，最常見嘅結果就係邊個都覺得唔係自己嗰邊嘅問題，而個客就係喺中間流失咗。
我哋做 Google Ads 嘅時候會連落地頁一齊處理，就係為咗唔想出現呢種三不管地帶。
次序係固定嘅：追蹤行先，之後先落錢。網站上面每個轉換事件同廣告平台嗰邊收到嘅數，由頭到尾驗一次、再同你後台真訂單對數，然後先開 campaign。落地頁如果唔啱，我哋寧願先改頁再落廣告。
Google Ads 管理由 HK$3,800 一個月起，月廣告費超過 HK$10,000 就改收廣告支出 20%。廣告預算可以你自己戶口出，亦可以我哋代處理，喺報價度寫清楚就得。如果一個渠道賺唔返自己，我哋會照直叫你收手，同埋建議啲錢調去邊。
想知你個戶口而家有冇中緊上面任何一條，我哋有免費廣告同分析帳戶檢查：只需要唯讀（viewer）權限，每間公司一次，睇完會寫返份短報告畀你。